Misr terma jamoasi bosh murabbiyi Hossam Hassan JCH-2026 turnirining 1/8 finalidan o‘rin olgan bahsda Lionel Messi va boshqa argentinalik futbolchilar bilan yuzaga kelgan to‘qnashuv haqida fikr bildirdi.
Eslatib o‘tamiz, uchrashuv Argentinaning 3:2 hisobidagi irodali g‘alabasi bilan yakunlangan edi. Final xushtagidan so‘ng Hassan hakamlar va tashkilotchilarni argentinaliklarga yordam berganlikda aybladi. Qo‘shib berilgan vaqtda Hassan odatda irqchilikka qarshi kurashda ishlatiladigan ishorani ko‘rsatgan edi.
«Bu ishora irqchilik bilan bog‘liq emas edi. Men hakamga bizga nisbatan adolatsizlik qilayotganini aytdim. Messi menga yaqinlashib, tinmay: «Nima uchun? Nima uchun?» deb so‘radi. U yana nimalar deganini bilmayman. Men uning faoliyati davomida erishgan barcha yutuqlariga bo‘lgan hurmatim tufayli unga javob bermaslikka qaror qildim», — deya Hassanning so‘zlaridan iqtibos keltirmoqda The Touchline.
Aytish joizki, Hassanning bu bayonoti haqiqatga unchalik to‘g‘ri kelmaydi. Messi haqiqatan ham murabbiyga yaqinlashib, hech qanday yomon niyatsiz nimadir deb so‘ragan, biroq bunga javoban Hassan va uning aytgan gaplari uchun maydondan chetlatilgan yordamchisi tomonidan juda tajovuzkor reaksiyaga duch kelgan edi.
