Миср терма жамоаси бош мураббийи Ҳоссам Ҳассан ЖЧ-2026 турнирининг 1/8 финалидан ўрин олган баҳсда Лионель Месси ва бошқа аргентиналик футболчилар билан юзага келган тўқнашув ҳақида фикр билдирди.
Эслатиб ўтамиз, учрашув Аргентинанинг 3:2 ҳисобидаги иродали ғалабаси билан якунланган эди. Финал хуштагидан сўнг Ҳассан ҳакамлар ва ташкилотчиларни аргентиналикларга ёрдам берганликда айблади. Қўшиб берилган вақтда Ҳассан одатда ирқчиликка қарши курашда ишлатиладиган ишорани кўрсатган эди.
«Бу ишора ирқчилик билан боғлиқ эмас эди. Мен ҳакамга бизга нисбатан адолатсизлик қилаётганини айтдим. Месси менга яқинлашиб, тинмай: «Нима учун? Нима учун?» деб сўради. У яна нималар деганини билмайман. Мен унинг фаолияти давомида эришган барча ютуқларига бўлган ҳурматим туфайли унга жавоб бермасликка қарор қилдим», — дея Ҳассаннинг сўзларидан иқтибос келтирмоқда The Touchline.
Айтиш жоизки, Ҳассаннинг бу баёноти ҳақиқатга унчалик тўғри келмайди. Месси ҳақиқатан ҳам мураббийга яқинлашиб, ҳеч қандай ёмон ниятсиз нимадир деб сўраган, бироқ бунга жавобан Ҳассан ва унинг айтган гаплари учун майдондан четлатилган ёрдамчиси томонидан жуда тажовузкор реакцияга дуч келган эди.
