«Liverpul» «Bornmut» vingeri Rayanga nisbatan jiddiy qiziqish bildirmoqda. TEAMtalk xabariga ko‘ra, klub allaqachon 19 yoshli braziliyalik futbolchi borasida ma’lumotlar yig‘ishni boshlagan. U Muhammad Salahning uzoq muddatli o‘rinbosari sifatida ko‘rilmoqda.

Mersisaydliklarning yangi bosh murabbiyi Andoni Iraola, «Bornmut»da Rayan bilan birga ishlagan, futbolchiga ijobiy baho bergan va uning salohiyatini juda yuqori deb hisoblaydi. «Liverpul» futbolchi bilan joriy yilning yanvarida «Vasko da Gama»dan Angliyaga ko‘chib o‘tmasidan oldin ham qiziqqan edi, ammo «Bornmut» tezroq harakat qilgan. Rayan mavsumning ikkinchi yarmida Premyer-ligadagi 13 ta uchrashuvda beshta gol va ikkita golli uzatmaga mualliflik qilib, chempionatga tez moslashdi va 2026 yilgi Jahon chempionati uchun Braziliya terma jamoasi qaydnomasiga kiritildi.

Manbaga ko‘ra, futbolchining shartnomasida 130 million funt (€153 million) miqdorida tovon puli belgilangan, biroq bu band 2027 yildan oldin kuchga kirmaydi. Hozirda «Bornmut» vaziyatni to‘liq nazorat qilmoqda va eng istiqbolli o‘yinchilaridan birini transferdan so‘ng olti oy o‘tib qo‘yib yuborish niyatida emas. «Liverpul»dan tashqari, Rayanning rivojlanishini «Barselona», «Bavariya» va «Pari Sen-Jermen» klublari ham kuzatmoqda. Mersisaydliklar, shuningdek, «Brayton»dan Yankuba Minte va Krissensio Sammervill kabi muqobil variantlarni ham ko‘rib chiqmoqda.