Samarqandning «Dinamo» klubi Superliganing ikkinchi davrasi boshlanishi arafasida tarkibni kuchaytirish ishlarini davom ettirmoqda.

Jamoa matbuot xizmati xabariga ko‘ra, yozgi transfer oynasida klub bosniyalik yarimhimoyachi Haris Haydarevich bilan shartnoma imzolagan. 27 yoshli futbolchi samarqandliklar safiga erkin agent maqomida kelib qo‘shildi. Klub va futbolchi o‘rtasidagi kelishuv 2027 yil yakuniga qadar, ya’ni 1,5 yilga mo‘ljallangan.

Ma’lumot uchun, Haydarevich so‘nggi uch yil davomida Serbiyaning «Radnik» klubi sharafini himoya qilgan. U ushbu jamoa tarkibida 107 ta o‘yinda maydonga tushib, 12 ta gol urishga erishgan va shu yilning 1 iyul kuni klub bilan amaldagi shartnomasi yakunlangach, erkin agentga aylangan edi. Futbolchi faoliyati davomida Bosniya va Gersegovinaning «Jeleznichar» hamda Turkiyaning «Boluspor» klublarida ham to‘p surgan.