Самарқанднинг «Динамо» клуби Суперлиганинг иккинчи давраси бошланиши арафасида таркибни кучайтириш ишларини давом эттирмоқда.

Жамоа матбуот хизмати хабарига кўра, ёзги трансфер ойнасида клуб босниялик яримҳимоячи Ҳарис Ҳайдаревич билан шартнома имзолаган. 27 ёшли футболчи самарқандликлар сафига эркин агент мақомида келиб қўшилди. Клуб ва футболчи ўртасидаги келишув 2027 йил якунига қадар, яъни 1,5 йилга мўлжалланган.

Маълумот учун, Ҳайдаревич сўнгги уч йил давомида Сербиянинг «Радник» клуби шарафини ҳимоя қилган. У ушбу жамоа таркибида 107 та ўйинда майдонга тушиб, 12 та гол уришга эришган ва шу йилнинг 1 июль куни клуб билан амалдаги шартномаси якунлангач, эркин агентга айланган эди. Футболчи фаолияти давомида Босния ва Герцеговинанинг «Железничар» ҳамда Туркиянинг «Болуспор» клубларида ҳам тўп сурган.