Germaniya terma jamoasi sobiq yarim himoyachisi Marko Roys Yurgen Kloppning milliy jamoa bosh murabbiyi etib tayinlanishi haqidagi xabarlarga o‘z munosabatini bildirdi.

«Menimcha, Klopp — ideal murabbiy, xoh u klub, xoh terma jamoa bo‘lsin. Unda har qanday jamoani boshqarish uchun zarur bo‘lgan barcha xislatlar mujassam. Ammo gap Germaniya terma jamoasi haqida ketar ekan, masala faqat milliy jamoa bilan chegaralanmaydi. Agar u bu lavozimga rozilik bildirsa, juda ko‘p narsani o‘zgartirib yuboradi», — deya Roysning so‘zlarini keltiradi L'Equipe.

Avvalroq «Liverpul», Dortmundning «Borussiya»si va «Mayns» klublarida ishlagan 59 yoshli mutaxassis milliy jamoani boshqarishga rozilik bergani haqida xabarlar paydo bo‘lgandi.

U Germaniya terma jamoasi bosh murabbiyi lavozimida Yulian Nagelsmannning o‘rnini egallaydi. Nagelsmann nemislar JCH-2026 dan chiqib ketgach, iste’foga chiqarilgan edi. 29 iyun kuni ular turnirning 1/16 finalida Paragvayga (1:1, penaltilar seriyasi 3:4) imkoniyatni boy berishgandi.