Германия терма жамоаси собиқ ярим ҳимоячиси Марко Ройс Юрген Клоппнинг миллий жамоа бош мураббийи этиб тайинланиши ҳақидаги хабарларга ўз муносабатини билдирди.

«Менимча, Клопп — идеал мураббий, хоҳ у клуб, хоҳ терма жамоа бўлсин. Унда ҳар қандай жамоани бошқариш учун зарур бўлган барча хислатлар мужассам. Аммо гап Германия терма жамоаси ҳақида кетар экан, масала фақат миллий жамоа билан чегараланмайди. Агар у бу лавозимга розилик билдирса, жуда кўп нарсани ўзгартириб юборади», — дея Ройснинг сўзларини келтиради L'Equipe.

Аввалроқ «Ливерпуль», Дортмунднинг «Боруссия»си ва «Майнц» клубларида ишлаган 59 ёшли мутахассис миллий жамоани бошқаришга розилик бергани ҳақида хабарлар пайдо бўлганди.

У Германия терма жамоаси бош мураббийи лавозимида Юлиан Нагельсманннинг ўрнини эгаллайди. Нагельсманн немислар ЖЧ-2026 дан чиқиб кетгач, истеъфога чиқарилган эди. 29 июнь куни улар турнирнинг 1/16 финалида Парагвайга (1:1, пенальтилар серияси 3:4) имкониятни бой беришганди.