Argentina terma jamoasi va Fransiyaning «Lion» klubi laterali Nikolas Talyafiko yozgi transfer oynasida jamoasini o‘zgartirishi mumkin. Bu haqda insayder Nikolo Skira ijtimoiy tarmoqlar orqali xabar berdi.
Manba bergan ma’lumotlarga ko‘ra, 33 yoshli himoyachini o‘z safiga qo‘shib olishga ikkita Yevropa klubi qiziqish bildirmoqda. Gap Angliyaning «Nottingem Forest» va Ispaniyaning «Deportivo» klublari haqida bormoqda.
Nikolasning «to‘quvchilar» bilan amaldagi mehnat shartnomasi kelasi yilning yozida o‘z nihoyasiga yetadi.
JCH-2026 da tajribali himoyachi Argentina terma jamoasi safida oltita o‘yinda maydonga tushdi. Finalda «albiseleste» 19 iyul kuni Ispaniyaga qarshi bahs olib boradi.
