Neymar «Santos» o‘yinini o‘tkazib yubordi va poker turnirida ishtirok etdi.
22 iyulga o‘tar kechasi «Santos» Sudamerika kubogi doirasidagi safar o‘yinida Venesuelaning «USV» klubini mag‘lub etdi (4:1). Jahon chempionatidan keyingi ta’tildan Braziliya klubi ixtiyoriga qaytgan Neymar murabbiylar shtabining qaroriga ko‘ra jamoa bilan o‘yinga bormadi, chunki u yakka tartibdagi dastur bo‘yicha mashg‘ulot o‘tkazmoqda.
Goal nashrining ESPN Brazil’ga tayanib xabar berishicha, «Santos» o‘yini bo‘lib o‘tgan kuni Neymar San-Pauluda Braziliya poker seriyasi (BSOP) turnirida qatnashgan.
Qayd etilishicha, o‘tgan yili braziliyalik hujumchi ushbu turnirda 53 500 real (9 239 yevro) ishlab olgan edi.
