«Chelsi» shu yozda himoyachi Aksel Disasini sotishga tayyor.

The Sun nashri ma’lumotlariga ko‘ra, fransiyalik futbolchini o‘z safiga qo‘shib olishga ko‘plab klublar qiziqish bildirmoqda. Shuningdek, «Milan» ham futbolchining transferi bo‘yicha rasmiy so‘rov yubordi. «Ko‘klar» Disasini 25 million funt sterling evaziga qo‘yib yuborishga tayyor.

Aksel Disasi 2023 yilda «Monako»dan «Chelsi»ga 45 million yevro evaziga o‘tgan edi. Uning London klubi bilan shartnomasi 2029 yilning 30 iyunigacha mo‘ljallangan. 2025/26 yilgi mavsumning ikkinchi yarmida himoyachi ijara huquqi asosida «Vest Xem» safida to‘p surdi. U «bolg‘achilar» tarkibida barcha turnirlarda 17 ta o‘yinda maydonga tushib, 1 ta gol urgan. Transfermarkt portali Disasining hozirgi narxini 15 million yevroga baholamoqda.