MLS «Inter Mayami» tomonidan Kazemiro bilan shartnoma imzolanganidan so‘ng, futbolchini noqonuniy ravishda o‘z tomoniga og‘dirib olishga urinish ayblovlari bo‘yicha surishtiruv o‘tkazmoqda.

Chorshanba kuni Amerika klubi o‘tgan mavsum oxirida «Manchester Yunayted»ni tark etgan 34 yoshli futbolchining transferini e’lon qildi. Braziliyalik yarim himoyachi MLSning 2027 yilgi mavsumi oxirigacha mo‘ljallangan va yana 2029 yil iyunigacha uzaytirish opsiyasiga ega bo‘lgan shartnomaga qo‘l qo‘ydi.

Bundan so‘ng liga bayonot e’lon qilib, unda klub «futbolchini noqonuniy og‘dirib olishga urinish»da gumonlanayotgani aytib o‘tilgan.

Surishtiruv futbolchini sotib olish huquqiga (Discovery Rights) tegishli — bu MLS qoidasi bo‘lib, muayyan klubga agar futbolchi ligaga o‘tishni istasa, u bilan shartnoma tuzishda birinchi galdagi ustuvorlikni beradi. Klub bir vaqtning o‘zida o‘z da’vogarlar ro‘yxatida 5 nafargacha futbolchini ushlab turishi, ularni ro‘yxatga qo‘shishi yoki chiqarib tashlashi mumkin.

Kazemironi sotib olish huquqi «Los-Anjeles Gelaksi»ga tegishli edi, biroq shartnoma imzolanganini e’lon qilar ekan, «Inter Mayami» bu huquqlarni sotib olganini bildirdi.

«Los-Anjeles Gelaksi» va «Inter Mayami» klublari Kazemironi sotib olish bo‘yicha ustuvorlik yuzasidan kelishuvga erishdilar va shartlar MLSda o‘tkazilayotgan noqonuniy og‘dirib olish urinishi bo‘yicha surishtiruv yakunlangach oshkor qilinadi», — deyiladi Los-Anjeles jamoasi bayonotida.