Braziliya terma jamoasi bosh murabbiyi Karlo Anchelotti Italiya futbol federasiyasi (FIGC) unga milliy jamoani boshqarishni taklif qilganini tasdiqladi. Biroq italiyalik mutaxassis Braziliya terma jamoasidagi faoliyatini davom ettirishga qaror qilgani uchun ushbu taklifni rad etgan.

Eslatib o‘tamiz, shu hafta Roberto Manchini Italiya terma jamoasi bosh murabbiyi etib tayinlangan edi.

«Bu shartnoma masalasi emas, sabab ham unda emas. Mening Braziliya futbol konfederasiyasi va bu mamlakat oldida majburiyatlarim bor. Chunki bu mamlakat birinchi yildanoq meni juda iliq kutib oldi. Albatta, Italiya futbol federasiyasiga minnatdorlik bildirdim, ammo shu yerda qolishni istayman. Chunki meni shunday yaxshi qabul qilgan mamlakatda va ishlash imkonini bergan tashkilotda faoliyatimni davom ettirishni to‘g‘ri va adolatli qaror deb hisoblayman», — dedi Anchelotti ESPN'ga bergan intervyusida.

Eslatib o‘tamiz, joriy yilning may oyida 67 yoshli mutaxassis Braziliya terma jamoasi bilan shartnomasini yana to‘rt yilga, ya’ni 2030 yilgi jahon chempionatiga qadar uzaytirgan edi.

Anchelotti boshchiligida Braziliya terma jamoasi 2026 yilgi jahon chempionatida 1/8 finalgacha yetib bordi va ushbu bosqichda Norvegiyaga mag‘lub bo‘lib, musobaqani tark etdi.