Milanning «Inter» klubi yangi a’zosi Jon Stouns kelishuv rasman e’lon qilinganidan so‘ng o‘z taassurotlarini bildirdi.
«Neradzurri» payshanba kuni 32 yoshli markaziy himoyachi bilan shartnoma imzolanganini tasdiqladi. Angliyalik futbolchi Italiya chempionlari safiga erkin agent sifatida kelib qo‘shildi.
«Men hamisha g‘alabalarga chanqoq bo‘lgan insonlar toifasidanman. Fikrimcha, eng muhimi shu. Faoliyatim davomida ko‘plab sovrinlarni qo‘lga kiritish baxtiga muyassar bo‘lganman va ushbu tajribamni yangi jamoaga olib kirmoqchiman. Klubga yordam berishni hamda murabbiy Kivu va uning yordamchisi, ilgari «Manchester Siti»da birga to‘p surganim Kolarov qo‘l ostida futbolchi sifatida o‘sishda davom etishni istayman. Mahoratim jamoaga asqatadi deb juda umid qilaman. Men yangi liga va yangi uslubda o‘zimni sinab ko‘rishga tayyorman», — deya APLning olti karra g‘olibi so‘zlarini keltiradi Inter Xtra.
Jon Stouns o‘n yil davomida «Manchester Siti» sharafini himoya qilgan.
