«Chelsi» vingeri Mixail Mudrik antidoping qoidalarini buzish bo‘yicha qo‘yilgan diskvalifikasiya bekor qilingani va faoliyatini qayta tiklayotgani haqida atroflicha bayonot berdi.

«Uzoq davom etgan kurashdan so‘ng menga qo‘yilgan to‘rt yillik taqiq bekor qilindi va men zudlik bilan faoliyatimni tiklashim mumkin.

Ushbu jarayon o‘z nihoyasiga yetganidan, menga futbolga qaytishga ruxsat berilganidan va endi oldinga qarab intila olishimdan minnatdorman. Bu faoliyatimdagi eng murakkab davr bo‘ldi.

Ushbu ishning eng boshidan beri ta’kidlab kelganimdek, men hech qachon bilib turib yoki qasddan hech qanday taqiqlangan moddalarni qabul qilmaganman. Halol kurash olib borish, klubim va mamlakatimni butun professionallik va halollik bilan namoyon etish men uchun hamisha juda muhim bo‘lgan.

Oilam va do‘stlarimga ushbu davr mobaynida meni qo‘llab-quvvatlaganliklari va menga ishonganliklari uchun tashakkur aytmoqchiman. Shuningdek, «Chelsi»dagi barchaga, jamoadoshlarimga va butun vaqt davomida meni qo‘llab-quvvatlagan «Chelsi» muxlislariga chuqur minnatdorchilik bildiraman.

Bundan tashqari, advokatlar jamoamga va menga yordam bergan barchaga ushbu ish bo‘yicha tinimsiz qilgan mehnatlari uchun rahmat aytaman.

Hozirda bor e’tiborimni futbolga qaytishga, har kuni astoydil mashg‘ulot o‘tkazishga va maydonda foyda keltirishga qaratganman. Menga ishonishda davom etgan barchaga rahmat. Faoliyatimdagi keyingi bosqichni intiqlik bilan kutib qolaman», — deb yozdi ukrainalik futbolchi.