Noa Lang yaqin haftalarda «Napoli»ni tark etishi mumkin. Italiya klubi 27 yoshli vinger bilan xayrlashishga tayyor va uni boshqa jamoalarga faol tarzda taklif qilmoqda, deb xabar beradi vi.nl portali.
Bir yil oldin «Napoli» Niderlandiya terma jamoasi futbolchisini PSVdan taxminan 28 million yevroga sotib olgan edi. Biroq Langga neapolitanliklar tarkibida mustahkam o‘rnashib olish nasib etmadi. Antonio Konte qo‘l ostida u o‘z salohiyatini to‘liq namoyon eta olmadi va «Galatasaray»ga ijaraga berildi.
«Napoli» futbolchini ma’lum shartlar bajarilganda majburiy sotib olish bandi kiritilishi evaziga ijaraga berishga tayyor. Shuningdek, o‘yinchini taxminan 25 million yevro evaziga to‘liq sotib olish mumkinligi ta’kidlanmoqda.
