«Barselona» hujumchi Ferran Torres bilan shartnomani uzaytirishni istasa, «Manchester Siti»ga 8 million yevro to‘lashiga to‘g‘ri keladi. Bu haqda Marca nashri jurnalisti Matteo Moretto xabar berdi.

Manbaga ko‘ra, mazkur shart 2022 yil yanvar oyida futbolchining «Manchester Siti»dan «Barselona»ga o‘tish transferi vaqtida imzolangan kelishuvga kiritilgan.

Ferran Torresning kataloniyaliklar bilan amaldagi shartnomasi yana bir yildan keyin yakunlanadi. Biroq «Barselona» bir necha oydan beri uning shartnomasini uzaytirish borasida hech qanday amaliy qadam tashlamagan. Shu sababli futbolchi hozirda klub uchun ustuvor nomzod emasligini tushunib turibdi.

Xabar qilinishicha, Torres keyingi mavsumni ham shartnomasini uzaytirmasdan «Barselona» safida o‘tkazishi mumkin. Ammo PSJning qiziqishi vaziyatni o‘zgartirishi ehtimoldan xoli emas.

Manbaning ta’kidlashicha, parijliklar bilan muzokaralar kelasi hafta boshlanishi kutilmoqda. Ferran Torres esa Kataloniyada o‘zini yetarlicha qadrlanmayotganini his qilayotgani uchun klubni tark etishga tayyor.