«Manchester Yunayted» hujumchisi Jozef Gabriel «qizil iblislar»ning asosiy jamoasi safida maydonga tushgan eng yosh futbolchi bo‘ldi. Shanba, 1 avgust kuni Madridning «Atletiko» klubiga qarshi kechgan o‘rtoqlik o‘yinida (2:1) forvard 15 yosh va 299 kunlik edi.
Gabriel «Manchester Yunayted»ning sobiq darvozaboni Devid Gaskell tomonidan o‘rnatilgan rekordni yangiladi — Gaskell mankunianliklarning asosiy tarkibida 16 yosh va 19 kunligida debyut qilgan edi.
«Atletiko»ga qarshi o‘yinda 15 yoshli Gabriel 82-daqiqada maydonga tushib, dubl muallifiga aylangan Brayan Mbemoni almashtirdi. Hujumchi 2025 yilning yozidan buyon «qizil iblislar» tizimida harakat qilib kelmoqda.
