UYEFA prezidenti Aleksander Cheferin tashkilotga a’zo bo‘lgan va Janni Infantinoning FIFA rahbarligiga qayta saylanishini yozma ravishda qo‘llab-quvvatlagan barcha mamlakatlardan ushbu hujjatlarni qaytarib olishni so‘rash masalasini muhokama qilmoqda. Bu haqda talkSPORT nashri xabar bermoqda.

Manba beradigan ma’lumotlarga ko‘ra, hozirgi vaqtda UYEFAga a’zo 55 ta mamlakatdan 40 tasi tegishli xatlarni yuborib bo‘lgan. KONKAKAF va Osiyo futbol konfederasiyasi (OFK) a’zolari ham Infantinoni qo‘llab-quvvatlashni to‘xtatishga tayyor.

FIFAning bir qancha yuqori lavozimli rahbarlari, jumladan, bosh kotib Mattias Grafstryom ham Infantinoning iste’fosini talab qilmoqda. Ular aks holda unga nisbatan ishonchsizlik votumi bildirilishini tushunib turishibdi.

Angliya futbol assosiasiyasining ismini oshkor etmagan ayrim yuqori martabali mulozimlari 2026 yilgi jahon chempionati oldidan FIFA rahbariga berilgan rasmiy qo‘llab-quvvatlashni qaytarib olish yoki olmaslik masalasini allaqachon muhokama qilishganini ma’lum qilishdi.

FIFA prezidenti saylovi 2027 yilning 17 martiga rejalashtirilgan.