Madridning «Real» klubi qanot hujumchisi Vinisius Junior bo‘yicha kamida 150 million yevrolik takliflarni ko‘rib chiqishga tayyor. Bu haqda The Touchline nashri jurnalist va insayder Xose Feliks Dias ma’lumotlariga tayanib xabar berdi.

Manbaga ko‘ra, agar braziliyalik futbolchi yangi shartnoma imzolashdan bosh tortsa, «qaymoqranglilar» uni transferga qo‘yish variantini ko‘rib chiqadi.

Avvalroq Vinisius vaziyatini Londonning «Arsenal» klubi diqqat bilan kuzatayotgani haqida xabarlar tarqalgan edi.

Vinisius 2018 yil yozidan buyon «Real» sharafini himoya qilib kelmoqda. Shu vaqt ichida u barcha musobaqalarda 375 ta uchrashuvda maydonga tushib, 128 ta gol va 100 ta golli uzatma muallifi bo‘lgan.

Uning madridliklar bilan amaldagi shartnomasi 2027 yilning yozigacha amal qiladi.