Londonning «Arsenal» klubi adidas brendi bilan hamkorlikda 2026/2027 yilgi mavsum uchun uchinchi o‘yin libosini taqdim qildi. «To‘pchilar» matbuot xizmatining ma’lum qilishicha, yangi libos klubning qadriyatlari, yuksak maqsadlari va ijodkorlik ruhidan ilhomlangan.

Klub bayonotida ta’kidlanishicha, besh mavsumdan keyin afsonaviy sariq rang yana qaytarildi. Shuningdek, «Arsenal»ning eng mashhur dizayn elementlaridan biri zamonaviy talqinda qayta ishlangan.

— «Arsenal ruhiyati» degani, «Arsenal» oddiy klub emas, balki umumiy imkoniyatlar hissini anglatadi. Bu — avlodlar davomida futbolchilar, muxlislar va klub hamjamiyati tomonidan shakllantirilgan dunyoqarash bo‘lib, ular doimo o‘z yo‘lidan borish, oldinga intilish va yillar o‘tsa ham qadri yo‘qolmaydigan xotiralarni yaratishga ishonib kelgan.

Yangi uchinchi libos aynan shu ruhni o‘zida aks ettiradi. Klub Angliya Premyer-ligasi chempioni sifatida yangi davrga qadam qo‘yar ekan, yuqori standartlarni saqlab qolish va yanada oldinga intilishni maqsad qilgan.

«Arsenal» tarixidagi eng yorqin sahifalar bilan bog‘liq bo‘lgan sariq rang asosida yaratilgan ushbu dizayn klubning boy merosi va zamonaviy qiyofasini o‘zida mujassam etgan. Shuningdek, klubning mashhur chaqmoq ramzi yangicha ko‘rinishda matoga uyg‘unlashtirilgan bo‘lib, u «Arsenal» tarixining ajralmas qismi hisoblanadi, — deyiladi klub rasmiy saytidagi bayonotda.