Sport jurnalisti va sharhlovchi Dmitriy Guberniyev afsonaviy hujumchi Diyego Maradona futbolni Lionel Messi va Krishtianu Ronaldudan yaxshiroq o‘ynaganini ta’kidladi.
«Demak, men ham Rodriga o‘xshayman — juda katta hajmda ish bajaraman! Qarang, aniq uzatmalarim 93 foizni tashkil qiladi. Bu haqda yana to‘xtalamiz. Agar xolisona baholasak, jahon chempionatining eng yaxshi futbolchisi har doim ham superyulduz bo‘lmaydi.
Ko‘rib turganingizdek, bugun Maradonaning futbolkasida keldim. Uni menga Gasilin sovg‘a qilgan. Juda yaxshi ish qilibdi! Meningcha, Maradona futbolni Messi va Ronaldudan yaxshiroq o‘ynagan, ammo bu qisqa vaqt davom etdi. Albatta, Messining faoliyatini Maradonaniki bilan taqqoslab bo‘lmaydi. Maradona doping bilan bog‘liq mojaroga aralashgan, Messi esa bir nechta jahon chempionatlarida ajoyib o‘yin ko‘rsatdi.
Men Peleni ko‘rmaganman, ammo Maradonani 1982 yildan boshlab kuzatganman. 1986, 1990 va hatto 1994 yilgi jahon chempionatlarida ham uning o‘yinlarini tomosha qildim. AQSHdagi mundialda u bitta o‘yin o‘tkazdi, keyin esa hammasi tugadi. Maradona nafaqat futbolchi, balki haqiqiy shoumen, sehrgar edi. Uning mashhur razminkasi butun dunyo OAVida tarqalganini eslasangiz. Bu borada Messidan farq qilardi.
Shu bilan birga, u futbolning «yomon bolasi» ham edi. Erta vafot etdi. Agar tanasiga va kasbiga munosabati haqida gapirsak, Messi va Ronaldu ancha professional. Ammo biz aynan futbol haqida gapiryapmiz.
Rodri haqida aytsam, mehnat qilish kerak. Balki u yulduzlik nuqtai nazaridan unchalik ko‘zga tashlanmas, ammo Ispaniya terma jamoasi uchun naqadar muhim futbolchi edi! Jamoada Yamal kabi yulduz bor, lekin u hali Messi yoki Ronaldu darajasida emas. Fransiyaning hujum chizig‘idagi to‘rtlik esa hatto The Beatles emas, Kiss ham bo‘la olmadi. Endi Zidan ulardan qanday jamoa yasashini ko‘ramiz.
Shuning uchun ham dunyoni superyulduzlar emas, balki mehnatkash va yaxshi insonlar boshqaradi. Men ham o‘zim haqimda shunday kamtarona fikr bildirdim», — dedi Guberniyev «Chempionat» nashri muxbiri Yegor Kabakka bergan intervyusida.
