Xalqaro shaxmat federasiyasi (FIDE) 15–27-sentyabr kunlari O‘zbekistonning Samarqand shahrida bo‘lib o‘tadigan 46-Butunjahon shaxmat olimpiadasida ishtirok etadigan Qozog‘iston ayollar terma jamoasi ro‘yxatini e’lon qildi. Bu haqda Sports.kz nashri xabar bermoqda.

2026-yilgi olimpiadada Qozog‘iston sharafini kattalar o‘rtasidagi ayollar reytingida 5-o‘rinni band etib turgan Bibisora Assaubayeva, shuningdek, o‘smir qizlar o‘rtasidagi jahon reytingida yuqori o‘rinlarni egallagan Alua Nurman (2-o‘rin), Meruyert Kamalidenova (4-o‘rin), Elnaz Kaliaxmet (22-o‘rin) hamda Zarina Nurgaliyeva (23-o‘rin) himoya qiladi. Jamoaga Pavel Kotsur sardorlik qilishi belgilangan.

Eslatib o‘tamiz, 2024-yilda Budapeshtda bo‘lib o‘tgan avvalgi Butunjahon shaxmat olimpiadasida Qozog‘iston ayollar terma jamoasi tarixiy kumush medallarni qo‘lga kiritib, oltin medal uchun kechgan kurashda faqatgina Hindiston jamoasiga imkoniyatni boy bergan edi.

Ma’lumot o‘rnida aytish joizki, Samarqandda o‘tadigan 2026-yilgi olimpiadada jami 400 ta — ochiq turnirda 208 ta va ayollar o‘rtasidagi musobaqada 192 ta jamoa ishtirok etishi kutilmoqda. Bu ko‘rsatkich musobaqa tarixidagi mutlaq yangi rekord hisoblanadi. Tadbirning ochilish marosimi 15-sentyabr kuni bo‘lib o‘tadi, 16-sentyabrdan 27-sentyabrgacha esa ishtirokchilar klassik vaqt nazorati ostida Shveysarcha tizim bo‘yicha 11 tur doirasida o‘zaro bahs olib boradilar.