«Galatasaroy» «Milan» vingeri Rafael Leau transferi bo‘yicha yangi taklif berishga tayyorlanmoqda.
Portugaliyalik futbolchiga o‘tish roziligini olish maqsadida mavsumiga 10 million yevro maosh ko‘zda tutilgan va 2030 yilgacha mo‘ljallangan shartnoma taklif qilindi. Leauning o‘zi esa yuqoriroq maosh talab qilmoqda — futbolchi jamoaning asosiy yulduzi Viktor Osimxen darajasida daromad olmoqchi.
Avvalroq «Galatasaroy» Leau transferi uchun «Milan»ga 30 mln yevro taklif qilgani, biroq «rossoneri»lar 50-60 mln yevro olmoqchi ekani haqida xabar berilgan edi.
Leau 2019 yilning yozidan beri «Milan»da to‘p surib kelmoqda. O‘tgan mavsumda vinger barcha turnirlarda 31 ta o‘yinda maydonga tushib, o‘z hisobiga 10 ta gol va 3 ta golli uzatma yozdirib qo‘ydi.
«Galatasaroy» o‘tgan 2025/26 yilgi mavsumda Turkiya chempioni bo‘ldi va Chempionlar Ligasining asosiy bosqichiga to‘g‘ridan-to‘g‘ri yo‘llanmani qo‘lga kiritdi.
