Fransiyaning «PSJ» klubi yarim himoyachi Magnes Akliushning «Monako»dan transferini rasman e’lon qildi.

Futbolchi bilan 2031 yilga qadar mo‘ljallangan shartnoma imzolandi. Akliush Parij klubida 11-raqam ostida to‘p tepadi.

Avvalroq OAVda Fransiya terma jamoasi a’zosi uchun «PSJ» «Monako»ga 50 million yevro to‘lashi haqida xabarlar tarqalgan edi.

Akliush «Monako» akademiyasi tarbiyalanuvchisi hisoblanadi. U asosiy jamoa safida 2022 yilning yozidan buyon to‘p surib kelayotgandi.

O‘tgan mavsumda yarim himoyachi barcha musobaqalarda 43 ta uchrashuvda maydonga tushib, 7 ta gol va 11 ta golli uzatmaga mualliflik qildi.

Transfermarkt ma’lumotiga ko‘ra, futbolchining bozor qiymati 50 million yevroga baholanmoqda.