Madridning «Atletiko» klubi «Tottenxem» himoyachisi Kristian Romeroning transferi bo‘yicha muzokaralarni boshladi. Bu haqda insayder Ben Jeykobs xabar bermoqda.
Argentinalik futbolchi o‘tgan yozdayoq Madrid klubiga o‘tishga qiziqish bildirgan edi. Joriy yozgi transfer oynasida uni o‘z safiga qo‘shib olish imkoniyatlarini Milanning «Inter» klubi ham o‘rganib chiqqan. Bundan tashqari, Romero nomzodi Londonning «Arsenal» klubi tomonidan ham muhokama qilingan.
Shunga qaramay, «Tottenxem» o‘z himoyachisini azaliy va prinsipial raqibiga sotish niyatida emas. «Shporlar» rahbariyati «Arsenal» tomonidan Romero bo‘yicha rasmiy so‘rov yuborilgani haqidagi xabarlarni ham inkor etmoqda.
28 yoshli argentinalik himoyachi 2021 yildan beri «Tottenxem» sharafini himoya qilib kelmoqda.
