«Barselona» himoyachisi Ronald Arauxo «Liverpul»ga transferini yakunlash uchun Angliyaga uchib bordi.

Avvalroq «Liverpul» urugvaylik futbolchini ijaraga olishi, shartnomada esa uni keyinchalik 55 million yevroga sotib olish bandi bo‘lishi ma’lum qilingandi.

Arauxoning rafiqasi Abigeyl Olivera ijtimoiy tarmoqlarda samolyot bortida eri va qizining suratini joylashtirib, «Qayerda bo‘lishimizdan qat’i nazar, biz birgamiz. Yangi boshlanish har doim Uning [Parvardigorning] qo‘lida», deb yozdi.

Taniqli insayder Fabrisio Romano ham Arauxoning Liverpul shahriga yo‘l olganini tasdiqladi. Jurnalist Jeyms Pirs esa keyinroq futbolchi manziliga yetib borgani va «qizillar» uchun tibbiy ko‘rikdan o‘tishga yo‘l olganini xabar qildi.