Madridning «Real» klubi bosh murabbiyi Joze Mourinyo murabbiylik faoliyatini vaqtincha to‘xtatishga munosabati haqida gapirdi.

«Futbol bilan bog‘liqligimni qachon to‘xtatishimni hatto tasavvur ham qila olmayman. Menimcha, yana 10 yil, balki undan ham ko‘proq ishlayman. Bu juda qiziq. Ko‘proq sovrinlarni qo‘lga kiritishni xohlayman. Buni hech qachon bo‘lmagan joylarimda amalga oshirishni istayman, shuningdek, avval g‘alaba qozongan joylarimda ham yana shunday natijaga erishmoqchiman.

Mening dunyom — 50-90 ming muxlis sig‘adigan futbol stadioni. Futbolsiz o‘zimni nimadandir mahrum bo‘lgandek his qilaman. Ammo buni vasvasa deb hisoblamayman. Menda bunday his yo‘q. Ma’lum bir darajaga yetganingizda, shunchaki shu darajada abadiy qolishni xohlaysiz.

Ayrim murabbiylarga uzoq muddatli ta’til kerak bo‘ladi, men esa bundan nafratlanaman. Bu so‘zni yoqtirmayman. Men uchun ta’til zaiflikni anglatadi. Menga ta’til haqida gapirmang. Menga hech qachon dam olish kerak emas. Qachon o‘lsam, o‘shanda dam olaman», — deya Mourinyoning so‘zlarini The Sun nashri keltiradi.