Мадриднинг «Реал» клуби бош мураббийи Жозе Моуриньо мураббийлик фаолиятини вақтинча тўхтатишга муносабати ҳақида гапирди.
«Футбол билан боғлиқлигимни қачон тўхтатишимни ҳатто тасаввур ҳам қила олмайман. Менимча, яна 10 йил, балки ундан ҳам кўпроқ ишлайман. Бу жуда қизиқ. Кўпроқ совринларни қўлга киритишни хоҳлайман. Буни ҳеч қачон бўлмаган жойларимда амалга оширишни истайман, шунингдек, аввал ғалаба қозонган жойларимда ҳам яна шундай натижага эришмоқчиман.
Менинг дунём — 50-90 минг мухлис сиғадиган футбол стадиони. Футболсиз ўзимни нимадандир маҳрум бўлгандек ҳис қиламан. Аммо буни васваса деб ҳисобламайман. Менда бундай ҳис йўқ. Маълум бир даражага етганингизда, шунчаки шу даражада абадий қолишни хоҳлайсиз.
Айрим мураббийларга узоқ муддатли таътил керак бўлади, мен эса бундан нафратланаман. Бу сўзни ёқтирмайман. Мен учун таътил заифликни англатади. Менга таътил ҳақида гапирманг. Менга ҳеч қачон дам олиш керак эмас. Қачон ўлсам, ўшанда дам оламан», — дея Моуриньонинг сўзларини The Sun нашри келтиради.
