Taniqli insayder Fabrisio Romano «PSJ» vingeri Bredli Barkolaning ehtimoliy transferi haqida yangi ma’lumot berdi.

23 yoshli fransuz futbolchisiga «Liverpul» hamon jiddiy qiziqish bildirmoqda. Xabarlarga ko‘ra, Barkolya Angliya klubiga o‘tishga rozilik bergan, shaxsiy shartlar bo‘yicha ham kelishuvga yaqinlashilgan. So‘nggi ma’lumotlarda ham futbolchining «Liverpul»ga o‘tish uchun «yashil chiroq» yoqqani qayd etilmoqda.

Chorshanba kuni Barkola «Aston Villa»ga qarshi UYEFA Superkubogi bahsida (2:1) zaxira o‘rindig‘ida qoldi.

«Bugun Barkolaning tana harakatlari ko‘p narsani anglatib turardi — go‘yo u g‘alabani nishonlashni istamayotgandek edi. Avval ham aytganimdek, Barkola «Liverpul»ga o‘tishni xohlayapti, shaxsiy shartlar bo‘yicha kelishuv deyarli tayyor», — dedi Romano.

Transfer insayderining ta’kidlashicha, endi barchasi ikki klub o‘rtasidagi muzokaralarga bog‘liq. Hozircha «Liverpul» va «PSJ» transfer summasi bo‘yicha yakuniy kelishuvga erishmagan.

Shu bilan birga, «PSJ» hujum chizig‘ini Mika Godts va Ferran Torres bilan kuchaytirsa, Barkolaning Parij klubini tark etish ehtimoli yanada oshishi mumkin.