«Real» akademiyasi tarbiyalanuvchisi Xakobo Ortega Madrid klubini tark etib, faoliyatini Fransiyada davom ettirishga yaqin.

So‘nggi ma’lumotlarga ko‘ra, 20 yoshli hujumchi bugun «Kastilya»dagi jamoadoshlari bilan xayrlashgan. Futbolchining «Strasbur»ga o‘tishi bo‘yicha muzokaralar yakuniy bosqichga yetgan va tomonlar transferning asosiy shartlarini kelishib olgan.

AS va Cadena SER ma’lumotiga ko‘ra, «Strasbur» Ortega uchun 10 mln yevro to‘laydi. Bu summa evaziga fransuz klubi futbolchiga bo‘lgan huquqlarning 70 foizini oladi, «Real» esa qolgan 30 foizini o‘z qo‘lida saqlab qoladi. Madridliklar kelishuvga futbolchining kelajagini nazorat qilish imkonini beruvchi qayta sotib olish va ustuvor huquq kabi mexanizmlarni ham kiritgan.

Ortega asosan «Real Madrid C» safida harakat qilgan bo‘lsa-da, mavsum davomida «Kastilya» va yoshlar jamoasida ham o‘ynadi. U 2025/26 yilgi mavsumda barcha yosh toifalari hisobida 19 ta gol urdi va ayniqsa UEFA Yoshlar ligasidagi o‘yinlari bilan e’tibor qozondi.

Fransiya klubining taklifi Ortegaga qiziqqan boshqa jamoalar orasida eng jozibador deb topilgan. «Strasbur» BlueCo guruhiga tegishli bo‘lib, ushbu tuzilma Angliyaning «Chelsi» klubiga ham egalik qiladi.

Ushbu kelishuv «Real» akademiyasi uchun ham tarixiy ahamiyat kasb etadi. Ortega asosiy jamoada biror marta rasmiy o‘yinga tushmasdan turib sotilgan klub tarbiyalanuvchilari orasida eng qimmat transferga aylanadi.

Endi futbolchining Fransiyaga yo‘l olishi, tibbiy ko‘rikdan o‘tishi va shundan so‘ng «Strasbur» bilan shartnoma imzolashi kutilmoqda.