«Реал» академияси тарбияланувчиси Хакобо Ортега Мадрид клубини тарк этиб, фаолиятини Францияда давом эттиришга яқин.

Сўнгги маълумотларга кўра, 20 ёшли ҳужумчи бугун «Кастилья»даги жамоадошлари билан хайрлашган. Футболчининг «Страсбур»га ўтиши бўйича музокаралар якуний босқичга етган ва томонлар трансфернинг асосий шартларини келишиб олган.

AS ва Cadena SER маълумотига кўра, «Страсбур» Ортега учун 10 млн евро тўлайди. Бу сумма эвазига француз клуби футболчига бўлган ҳуқуқларнинг 70 фоизини олади, «Реал» эса қолган 30 фоизини ўз қўлида сақлаб қолади. Мадридликлар келишувга футболчининг келажагини назорат қилиш имконини берувчи қайта сотиб олиш ва устувор ҳуқуқ каби механизмларни ҳам киритган.

Ортега асосан «Реал Мадрид C» сафида ҳаракат қилган бўлса-да, мавсум давомида «Кастилья» ва ёшлар жамоасида ҳам ўйнади. У 2025/26 йилги мавсумда барча ёш тоифалари ҳисобида 19 та гол урди ва айниқса UEFA Ёшлар лигасидаги ўйинлари билан эътибор қозонди.

Франция клубининг таклифи Ортегага қизиққан бошқа жамоалар орасида энг жозибадор деб топилган. «Страсбур» BlueCo гуруҳига тегишли бўлиб, ушбу тузилма Англиянинг «Челси» клубига ҳам эгалик қилади.

Ушбу келишув «Реал» академияси учун ҳам тарихий аҳамият касб этади. Ортега асосий жамоада бирор марта расмий ўйинга тушмасдан туриб сотилган клуб тарбияланувчилари орасида энг қиммат трансферга айланади.

Энди футболчининг Францияга йўл олиши, тиббий кўрикдан ўтиши ва шундан сўнг «Страсбур» билан шартнома имзолаши кутилмоқда.