"Koventri Siti" bosh murabbiyi Frenk Lempard yozgi transfer oynasi yopilgunga qadar "Chelsi" himoyachisi Josh Achimpongni o‘z jamoasiga jalb qilishga qiziqmoqda. Bu haqda talkSPORT xabar berdi.

"Chelsi" 20 yoshli iqtidorli futbolchini to‘liq sotishni istamayapti. Achimpong "Stemford Brij"dagi rahbarlar tomonidan hali ham yuqori baholanmoqda.

Shu bilan birga, London klubi yosh himoyachiga asosiy tarkibda ko‘proq o‘yin amaliyoti berish va uning rivojlanishini davom ettirish maqsadida qisqa muddatli ijara variantini ko‘rib chiqishi mumkin.

talkSPORT bosh futbol muxbiri Aleks Krukning fikricha, Achimpongning "Koventri"ga o‘tishi kuzatishga arziydigan transferlardan biri.

"Josh Achimpongga e’tibor bering. Frenk Lempard uni "Koventri"ga olib kelishni juda istayapti.

"Chelsi" bunday kelishuvga rozi bo‘lishi ehtimoli bor", — dedi Kruk The Window dasturida.

Achimpong "Chelsi"ning asosiy jamoasi bilan mashg‘ulotlarni davom ettirib, rivojlanib bormoqda. U markaziy himoyada ham, qanot himoyachisi sifatida ham harakat qila oladi.