Osiyo futbol konfederasiyasi (OFK) prezidenti Salmon bin Ibrohim Al-Xalifa FIFA prezidenti Janni Infantinoni qo‘llab-quvvatlagan Qatar futbol assosiasiyasini tanqid qildi.

Reuters ma’lumotiga ko‘ra, Infantinoni Marokash, Qatar va yana to‘rtta arab mamlakati futbol federasiyalari qo‘llab-quvvatlagan.

"Qit’a miqyosidagi birdamlik birinchi darajali ahamiyat kasb etayotgan bir paytda, sizning hozirgi pozisiyangiz va OFK prezidentining qonuniy vakolatlarini shubha ostiga qo‘yayotgan harakatlaringiz Osiyo futboli birligiga putur yetkazmoqda. Bu esa jahon miqyosida Osiyo futbol oilasi manfaatlarini himoya qilish bo‘yicha umumiy imkoniyatlarimizni zaiflashtiradi", — deya Al-Xalifaning so‘zlarini keltiradi The Times.

Avvalroq FIFA yangi tijoriy tuzilmaning ma’lum ulushini xususiy investorlarga sotish orqali 4,2 milliard dollar jalb qilish niyatida ekanini ma’lum qilgandi. Ushbu tashabbus futbol tashkilotlari tomonidan keskin tanqidga uchragach, FIFA loyihani amalga oshirishdan voz kechdi.

The Telegraph xabariga ko‘ra, mazkur tijoriy loyiha atrofidagi mojarodan keyin UYEFA Infantino FIFA prezidenti lavozimidan o‘z xohishi bilan ketmasa, unga nisbatan ishonchsizlik votumi bildirishni rejalashtirmoqda.