O‘zbekiston Superligasida bugun, 19 avgust kuni 18-tur doirasida navbatdagi ikki uchrashuv bo‘lib o‘tadi.
Kunning dastlabki bahsi Olmaliqda o‘tkaziladi. Soat 19:00da OKMK o‘z maydonida Samarqandning "Dinamo" klubini qabul qiladi. Soat 20:00da esa Muborakda "Mash’al" va "Andijon" jamoalari o‘zaro to‘qnash keladi.
18-tur 18 avgust kuni boshlangan edi. Dastlabki o‘yinlarda "So‘g‘diyona" o‘z maydonida "Qizilqum"ni 2:1 hisobida mag‘lub etdi. Turning eng kutilmagan natijasi Buxoroda qayd etildi — mezbonlar chempionat peshqadami "Neftchi" ustidan 4:1 hisobida yirik g‘alabaga erishdi.
Mazkur mag‘lubiyatga qaramay, "Neftchi" 42 ochko bilan turnir jadvalida birinchi o‘rinda qolmoqda. "Paxtakor" 38 ochko bilan ikkinchi, 33 ochko jamg‘argan "Buxoro" esa uchinchi pog‘onada bormoqda. OKMK 28 ochko bilan kuchli beshlikdan joy olgan.
18-tur uchrashuvlari 21 avgustga qadar davom etadi. 20 avgust kuni "Bunyodkor" — "Qo‘qon-1912" va "Xorazm" — "Lokomotiv", 21 avgustda esa "Navbahor" — "Nasaf" hamda "Paxtakor" — "Surxon" bahslari o‘tkaziladi.
