Ўзбекистон Суперлигасида бугун, 19 август куни 18-тур доирасида навбатдаги икки учрашув бўлиб ўтади.
Куннинг дастлабки баҳси Олмалиқда ўтказилади. Соат 19:00да ОКМК ўз майдонида Самарқанднинг "Динамо" клубини қабул қилади. Соат 20:00да эса Муборакда "Машъал" ва "Андижон" жамоалари ўзаро тўқнаш келади.
18-тур 18 август куни бошланган эди. Дастлабки ўйинларда "Сўғдиёна" ўз майдонида "Қизилқум"ни 2:1 ҳисобида мағлуб этди. Турнинг энг кутилмаган натижаси Бухорода қайд этилди — мезбонлар чемпионат пешқадами "Нефтчи" устидан 4:1 ҳисобида йирик ғалабага эришди.
Мазкур мағлубиятга қарамай, "Нефтчи" 42 очко билан турнир жадвалида биринчи ўринда қолмоқда. "Пахтакор" 38 очко билан иккинчи, 33 очко жамғарган "Бухоро" эса учинчи поғонада бормоқда. ОКМК 28 очко билан кучли бешликдан жой олган.
18-тур учрашувлари 21 августга қадар давом этади. 20 август куни "Бунёдкор" — "Қўқон-1912" ва "Хоразм" — "Локомотив", 21 августда эса "Навбаҳор" — "Насаф" ҳамда "Пахтакор" — "Сурхон" баҳслари ўтказилади.
