«Bavariya» hujumchisi Xarri Keyn Myunxen klubi bilan shartnomasini uzaytirish bo‘yicha muzokaralarni boshlashga tayyor ekanini ma’lum qildi. 33 yoshli angliyalik futbolchining amaldagi kelishuvi 2027 yil yoziga qadar mo‘ljallangan.

«Albatta, biz jahon chempionati va ta’tilimdan keyin muzokaralarni boshlashni rejalashtirgan edik. Aniq qachon bo‘lishini hozircha bilmayman, ammo bu shu hafta yoki keyingi haftada sodir bo‘ladi. Biz muzokaralarni boshlaymiz.

Avval ham aytganimdek, biz xotirjammiz. Menimcha, klub ham bu vaziyatga bosiqlik bilan yondashmoqda. Albatta, shartnomam tugashiga atigi bir yil qolgani uchun hozir muzokaralar uchun eng to‘g‘ri payt. Bu muhim masala. Biroq har ikki tomon ham xotirjam va muzokaralar shu yoki keyingi haftada boshlanishiga deyarli ishonchim komil», — deya Keynning so‘zlarini keltiradi BBC.

O‘tgan mavsumda Keyn barcha musobaqalar doirasida 51 ta o‘yinda maydonga tushib, 61 ta gol urdi va 7 ta golli uzatmani amalga oshirdi.

2026 yilgi jahon chempionatida esa u 7 ta uchrashuvda 6 ta gol va 1 ta golli uzatma qayd etdi.