«Бавария» ҳужумчиси Харри Кейн Мюнхен клуби билан шартномасини узайтириш бўйича музокараларни бошлашга тайёр эканини маълум қилди. 33 ёшли англиялик футболчининг амалдаги келишуви 2027 йил ёзига қадар мўлжалланган.

«Албатта, биз жаҳон чемпионати ва таътилимдан кейин музокараларни бошлашни режалаштирган эдик. Аниқ қачон бўлишини ҳозирча билмайман, аммо бу шу ҳафта ёки кейинги ҳафтада содир бўлади. Биз музокараларни бошлаймиз.

Аввал ҳам айтганимдек, биз хотиржаммиз. Менимча, клуб ҳам бу вазиятга босиқлик билан ёндашмоқда. Албатта, шартномам тугашига атиги бир йил қолгани учун ҳозир музокаралар учун энг тўғри пайт. Бу муҳим масала. Бироқ ҳар икки томон ҳам хотиржам ва музокаралар шу ёки кейинги ҳафтада бошланишига деярли ишончим комил», — дея Кейннинг сўзларини келтиради BBC.

Ўтган мавсумда Кейн барча мусобақалар доирасида 51 та ўйинда майдонга тушиб, 61 та гол урди ва 7 та голли узатмани амалга оширди.

2026 йилги жаҳон чемпионатида эса у 7 та учрашувда 6 та гол ва 1 та голли узатма қайд этди.