«Manchester Siti» «Chelsi» yarim himoyachisi Enso Fernandesni o‘z safiga qo‘shib olish g‘oyasidan hali ham voz kechmagan.

Insayder Fabrisio Romano ma’lumotiga ko‘ra, argentinalik futbolchining nomzodi «shaharliklar»ning ichki yig‘ilishlarida hamon muhokama qilinmoqda. 25 yoshli futbolchining agenti Xavyer Pastore ham mijozining ehtimoliy transferi bo‘yicha muntazam ravishda muzokaralar olib bormoqda.

«Agar «Manchester Siti» yana bir bor urinib ko‘rsa va «Chelsi» bilan muzokara boshlashga harakat qilsa, bundan hayron qolmayman», — dedi Romano.

Avvalroq London klubi 14 avgustdan keyin Enso Fernandes bo‘yicha tushadigan takliflarni ko‘rib chiqmasligi xabar qilingan edi.

Shunga qaramay, belgilangan muddat o‘tib ketgan bo‘lsa-da, yarim himoyachining «Chelsi»ni tark etishi mumkinligi haqidagi mish-mishlar hanuz tingani yo‘q.