«Манчестер Сити» «Челси» ярим ҳимоячиси Энцо Фернандесни ўз сафига қўшиб олиш ғоясидан ҳали ҳам воз кечмаган.

Инсайдер Фабрицио Романо маълумотига кўра, аргентиналик футболчининг номзоди «шаҳарликлар»нинг ички йиғилишларида ҳамон муҳокама қилинмоқда. 25 ёшли футболчининг агенти Хавьер Пасторе ҳам мижозининг эҳтимолий трансфери бўйича мунтазам равишда музокаралар олиб бормоқда.

«Агар «Манчестер Сити» яна бир бор уриниб кўрса ва «Челси» билан музокара бошлашга ҳаракат қилса, бундан ҳайрон қолмайман», — деди Романо.

Аввалроқ Лондон клуби 14 августдан кейин Энцо Фернандес бўйича тушадиган таклифларни кўриб чиқмаслиги хабар қилинган эди.

Шунга қарамай, белгиланган муддат ўтиб кетган бўлса-да, ярим ҳимоячининг «Челси»ни тарк этиши мумкинлиги ҳақидаги миш-мишлар ҳануз тингани йўқ.