«Barselona» qanot himoyachisi Joau Kanselu bilan shartnoma imzolaganini rasman e’lon qilish uchun biroz kutishiga to‘g‘ri keladi.

Jijantes ma’lumotiga ko‘ra, kataloniyaliklar portugaliyalik futbolchi bilan shartnoma shartlari bo‘yicha kelishuvga erishgan. Biroq uning rasmiy taqdimoti chorshanba kuni Misrning «Al-Ahli» klubiga qarshi o‘tkaziladigan Gamper kubogi bahsigacha bo‘lib o‘tmaydi.

Manba ta’kidlashicha, transferning o‘zida hech qanday muammo yo‘q. Kechikish kichik byurokratik masalalar bilan bog‘liq va o‘tish rasman keyinroq e’lon qilinadi.

Joau Kanselu «Al-Hilol» bilan shartnomasini bekor qilish shartlari bo‘yicha ham kelishib olgan. 32 yoshli futbolchi «Barselona»ga erkin agent sifatida qo‘shiladi.

Seshanba kuni kataloniyaliklar yarim himoyachi Rodri transferini rasman e’lon qilgan edi.