"Rasing" klubining chap qanot himoyachisi Xorxe Salinas Madridning "Atletiko" klubiga o‘tishi mumkin.
19 yoshli futbolchiga "Manchester Yunayted" ham qiziqish bildirmoqda. Transfer News Live nashri TEAMtalk ma’lumotlariga tayanib xabar berishicha, "matraschilar" "qizil iblislar"ning ispaniyalik futbolchiga qiziqishidan xabardor, ammo istiqbolli himoyachini o‘z safiga qo‘shib olishga qat’iy bel bog‘lagan. Madrid klubi transferni amalga oshirish bo‘yicha faol ish olib bormoqda.
Xorxe Salinasning shartnomasida 16 million yevro miqdorida tovon puli ko‘rsatilgan. Yosh lateral "Rasing"ning asosiy jamoasi safida 38 ta uchrashuvda maydonga tushgan. Uning ushbu mavsum boshlanganidan keyingi La Ligadagi bitta o‘yini ham shu statistikaga kiritilgan. Salinas bu uchrashuvlarda 7 ta golli uzatma amalga oshirgan.
"Manchester Yunayted" avvalroq Salinas uchun 16 million yevrolik tovon pulini to‘lashga tayyor ekani haqida xabarlar tarqalgan edi.
