"Aston Villa" hujumchi Olli Uotkinsni jamoada saqlab qolmoqchi. Bu haqda The Athletic xabar berdi.

Manba ma’lumotiga ko‘ra, jamoa bosh murabbiyi Unai Emeri yozgi transfer oynasida Uotkinsni qo‘yib yubormoqchi emas. Avvalroq hujumchi klub bilan shartnomasini uzaytirishdan bosh tortgan, ammo "Aston Villa" unga yangi taklif bergan.

Saudiya Arabistonining "Al-Hilol" klubi Uotkinsga qiziqish bildirishda davom etmoqda. Biroq "Aston Villa"ni futbolchini qo‘yib yuborishga ko‘ndirish oson bo‘lmaydi. So‘nggi xabarlarga ko‘ra, klub "Al-Hilol"ning 45 million yevrolik taklifini rad etgan.

Futbolchining o‘zi hozircha kelajagi borasida yakuniy qaror qabul qilmagan va turli variantlarni ko‘rib chiqishga tayyor.

30 yoshli Uotkins o‘tgan mavsum barcha musobaqalar doirasida 55 ta uchrashuv o‘tkazib, 21 ta gol urdi va 5 ta golli uzatmani amalga oshirdi.