"Benfika" markaziy himoyachi Alessandro Chirkatini o‘z safiga qo‘shib olganini e’lon qildi. 22 yoshli avstraliyalik futbolchi Italiyaning "Parma" klubidan o‘tdi va Portugaliya klubi bilan 2031 yilga qadar shartnoma imzoladi.

Transferning moliyaviy shartlari rasman ma’lum qilinmagan. Transfermarkt portali ma’lumotiga ko‘ra, transfer summasi 20 million yevroni tashkil etgan.

Chirkati "Parma" va "Pert Glori" klublari tarbiyalanuvchisi hisoblanadi. U Avstraliya terma jamoasi safida 17 ta uchrashuv o‘tkazib, 1 ta gol urgan. Himoyachi 2026 yilgi jahon chempionatida ham ishtirok etgan va terma jamoa bilan 1/16 finalga qadar yetib borgan.

O‘tgan mavsumda Chirkati 33 ta uchrashuvda maydonga tushib, 1 ta gol urdi va 1 ta golli uzatmani amalga oshirdi. Shuningdek, u 6 ta sariq kartochka olgan.