«Frayburg» darvozaboni Noa Atubolining «Marsel»ga ehtimoliy transferi bo‘yicha muzokaralar vaqtincha to‘xtatildi. Bu haqda jurnalist Florian Plettenberg xabar berdi.

Manba ma’lumotiga ko‘ra, tomonlar o‘rtasidagi muzokaralar yakuniy bosqichga yetib kelgan edi. Biroq o‘tgan dam olish kunlaridan boshlab kelishuv jarayoni pauzaga qo‘yilgan.

Shu bilan birga, Frankfurtning «Ayntraxt» klubi ham 24 yoshli nemis darvozabonini o‘z transfer ro‘yxatiga kiritgan. Agar klub Kauan Santos yoki Mixael Settererdan biri bilan xayrlashsa, Atubolu darvozabon pozisiyasini kuchaytirish uchun asosiy nomzodlardan biriga aylanishi mumkin. Biroq uning transferi katta mablag‘ talab qilishi kutilmoqda.

Atubolining o‘zi esa «Frayburg»ni tark etish istagini bildirgan.

Noa «Frayburg» tarbiyalanuvchisi hisoblanadi va asosiy jamoada 2022/23 yilgi mavsumda debyut qilgan. O‘tgan mavsumda u 50 ta uchrashuvda maydonga tushib, 70 ta gol o‘tkazib yubordi. Darvozabon 12 ta bahsda o‘z darvozasi daxlsizligini saqlab qoldi.