CIES Football Observatory tadqiqot markazining navbatdagi hisobotiga ko‘ra, dunyoning eng yirik ijtimoiy tarmoqlarida auditoriya to‘plash bo‘yicha Ispaniyaning ikki grand klubi tengsiz bo‘lib turibdi.

Madridning «Real» klubi 487,6 million obunachi bilan birinchi o‘rinni egallagan bo‘lsa, «Barselona» 441,8 million kuzatuvchi bilan ikkinchi pog‘onada bormoqda. Kuchli uchlikni 238,6 millionlik ko‘rsatkich bilan «Manchester Yunayted» yakunlab bergan.

Top-10 ro‘yxatidan shuningdek «PSJ», «Manchester Siti», «Liverpul», «Yuventus», «Bavariya», «Chelsi» va «Arsenal» klublari o‘rin olgan. Ushbu o‘nlikka kiruvchi jamoalar orasida bir yil davomida eng yuqori o‘sishni Myunxenning «Bavariya» klubi qayd etdi (+10,8%).

Eng ommabop 100 ta klub ro‘yxatidan Okeaniyadan tashqari barcha qit’alarning 25 ta mamlakati vakillari o‘rin olgan. Mamlakatlar bo‘yicha eng ko‘p klub Ispaniya (21), Angliya (17) va Braziliya (11) hissasiga to‘g‘ri keladi.

Yevropa qit’asidan tashqaridagi eng ommabop klublar sifatida Braziliyaning «Flamengo» (71,6 mln), Saudiya Arabistonining «An-Nasr» (66 mln) va Misrning «Al-Ahli» (60,1 mln) jamoalari qayd etildi.