«Atletiko» hujumchisi Xulian Alvares hamon «Arsenal»ga o‘tishni istamayapti. Argentinalik futbolchining asosiy maqsadi faoliyatini «Barselona»da davom ettirish bo‘lib qolmoqda. So‘nggi xabarlarda ham Alvaresning aynan Kataloniya klubini afzal ko‘rayotgani qayd etilgan.

26 yoshli hujumchi «Barselona» safiga qo‘shilishni xohlamoqda, ammo «Atletiko» o‘zining asosiy raqiblaridan birini kuchaytirish niyatida emas. Shu bilan birga, madridliklar futbolchini «Arsenal»ga sotish variantiga nisbatan ancha ochiq pozisiyada.

Jurnalist Xose Alvares ma’lumotiga ko‘ra, «Atletiko» «kanonirlar» bilan muzokara olib borishga tayyor. London klubi vakillari hujumchini fikridan qaytarish umidida u bilan muntazam ravishda aloqaga chiqmoqda. Biroq Alvares hozircha o‘z qarorini o‘zgartirmayapti va «Arsenal»ning takliflarini rad etishda davom etmoqda.

Agar vaziyatda kutilmagan o‘zgarish yuz bermasa, Xulian Alvares «Atletiko»da qolishi mumkin. Uning Madrid klubi bilan amaldagi shartnomasi 2030 yilga qadar mo‘ljallangan.