«Атлетико» ҳужумчиси Хулиан Альварес ҳамон «Арсенал»га ўтишни истамаяпти. Аргентиналик футболчининг асосий мақсади фаолиятини «Барселона»да давом эттириш бўлиб қолмоқда. Сўнгги хабарларда ҳам Альвареснинг айнан Каталония клубини афзал кўраётгани қайд этилган.

26 ёшли ҳужумчи «Барселона» сафига қўшилишни хоҳламоқда, аммо «Атлетико» ўзининг асосий рақибларидан бирини кучайтириш ниятида эмас. Шу билан бирга, мадридликлар футболчини «Арсенал»га сотиш вариантига нисбатан анча очиқ позицияда.

Журналист Хосе Альварес маълумотига кўра, «Атлетико» «канонирлар» билан музокара олиб боришга тайёр. Лондон клуби вакиллари ҳужумчини фикридан қайтариш умидида у билан мунтазам равишда алоқага чиқмоқда. Бироқ Альварес ҳозирча ўз қарорини ўзгартирмаяпти ва «Арсенал»нинг таклифларини рад этишда давом этмоқда.

Агар вазиятда кутилмаган ўзгариш юз бермаса, Хулиан Альварес «Атлетико»да қолиши мумкин. Унинг Мадрид клуби билан амалдаги шартномаси 2030 йилга қадар мўлжалланган.