Frank Kessye faoliyatini yana Italiya A Seriyasida davom ettirishi mumkin. 29 yoshli yarim himoyachi «Yuventus»ga o‘tish variantini ustuvor deb hisoblamoqda. Bu haqda insayder Janluka Di Marsio xabar berdi.

Manba ma’lumotiga ko‘ra, Kot-d’Ivuarlik futbolchi «keksa sinyora»dan aniq taklif kutmoqda. Biroq «Yuventus» Kessyeni o‘z safiga qo‘shib olishdan oldin bir nechta futbolchi bilan xayrlashishi kerak.

Turinliklar Artur Melo va yana bir yarim himoyachini jamoadan jo‘natishi kutilmoqda. Shundan so‘ng klub Kessye bilan shartnoma imzolash bo‘yicha amaliy harakatlarga o‘tishi mumkin.

Frank Kessye joriy yil yozida «Al-Ahli»ni tark etib, uch yillik Saudiya Arabistonidagi faoliyatidan so‘ng erkin agentga aylandi.

Kessye avvalroq «Barselona» sharafini ham himoya qilgan. Italiyada esa «Atalanta» va «Milan» safida to‘p tepgan.