«Bavariya» faxriy prezidenti Uli Xyoness Germaniya terma jamoasi bosh murabbiyi lavozimiga Yurgen Klopp tayinlangani haqida fikr bildirdi.

«Shaxsan men Yurgen Kloppni juda yaxshi murabbiy, haqiqatan ham juda yaxshi murabbiy deb hisoblayman. Ammo men kimgadir haddan tashqari sig‘inish tarafdori emasman. Unga xuddi suv ustida yura oladigandek munosabatda bo‘lishyapti.

U bir qo‘l harakati bilan hamma narsani o‘zgartirib yubora olmaydi. Biz uning juda qattiq ishlashini bilamiz. U ko‘p narsani boshqacha qiladi va ko‘p jihatlar yaxshilanadi. Ammo unga vaqt berish kerak. Eng muhimi, uni Masih deb hisoblamaslik lozim.

Bu voqeada menga yoqmayotgan jihat — uning agenti Mark Kosiske ham u yerga olib kelingani. Uning aniq vazifasi nimadan iboratligini bilmayman. Ammo u futbolchilar manfaatlarini himoya qiluvchi agentlikning boshqaruvchi direktori. Menimcha, bu muammo.

Bularning barchasi menga do‘stona egallab olishdek ko‘rinmoqda. Klopp va uning jamoasi Germaniya futbol ittifoqini egallab olgandek. Menimcha, bu noto‘g‘ri», — dedi Xyoness RTL nashriga bergan intervyusida.