«Bavariya» 2026/27-yilgi mavsum uchun uchinchi liboslar to‘plamini rasman taqdim etdi. Adidas tomonidan ishlab chiqilgan yangi forma asosan jamoaning Chempionlar ligasidagi o‘yinlarida foydalanish uchun mo‘ljallangan.

Yangi libos to‘q rangda tayyorlangan bo‘lib, unda qizil elementlar ajralib turadi. Klub emblemasi, Adidas'ning uch chizig‘i hamda futbolkaning orqa qismidagi FCBM yozuvi qizil rangda ishlangan. Futbolkaning asosiy qismida esa «Bavariya» tarixidagi mashhur voqealarga ishora qiluvchi yashirin tasvirlar joylashtirilgan.

Dizaynda Myunxen klubi tarixidagi to‘rt muhim lahza aks ettirilgan. Ulardan biri Frans Bekkenbauerning Yevropa futboli cho‘qqisidagi davriga bag‘ishlangan. Shuningdek, Aryen Robbenning 2013-yilgi Chempionlar ligasi finalida «Borussiya Dortmund» darvozasiga kiritgan hal qiluvchi goli ham dizayndan joy olgan.

Qolgan ikki voqea 2001-yilga tegishli. Ulardan biri Oliver Kannning Chempionlar ligasi finalida penaltini qaytargani bo‘lsa, ikkinchisi Patrik Anderssonning «Gamburg»ga qarshi o‘yinda so‘nggi daqiqalardagi jarima zarbasidan urgan goli orqali «Bavariya» Germaniya chempionligini qo‘lga kiritgan lahzadir.

Vensan Kompani boshchiligidagi jamoa yangi libosda ilk bor 22-avgust kuni «Borussiya Dortmund»ga qarshi Frans Bekkenbauer Superkubogi bahsida maydonga tushadi.

Yangi libos allaqachon «Bavariya»ning rasmiy onlayn do‘koni va klub savdo nuqtalarida sotuvga chiqarilgan.